破相的花花

閒情地去九龍公園,花花郤破相了〒_〒 

今日一家四口打算一早起身出去食個早餐就出發去九龍公園玩下行下,點知花花的trouble 2又出現了,一落街即時要抱,花爸當然唔肯啦。直接抱返花花回家,除埋花花的鞋襪,花花即時又發癲了。叫花花自己著襪同鞋就死都唔肯。結果差唔甬兩小時後先可以出到門口。期間花花不斷哭鬧不停,花媽花爸又鬧又氹終於成功出門口。唔洗抱就坐車仔啦`(*∩_∩*)′

正當一家人開開心心咁上去九龍公園斜路時,花爸輕輕一推,花花的車仔上斜再落返來,花花都覺得好開心咁卡卡笑,再而推動花爸大力一推,點知車仔回程時車碌轉向,車仔就向左跌落地,花花都即喊了。本身我地普通安撫花花,好似平時咁話冇野冇野,花花又好乖咁收起淚水,行行下...花媽一望,嘩,不得了,起左個瘤 T_T 花花好似知到有問題咁大喊,花爸都好自責。其實花爸花媽都有問題,安全意識太低了,應該加強的。希望大家唔牀好似我地咁無知啦,我個心真係好痛。

九龍公園內有個小博物館

估唔到九龍公園內有個文物同講香港建築的博物館。其實入面好多野睇,花媽同花爸都想睇多陣,可惜花花坐唔定,要周圍睇下跑下,我地唯有未睇完就走啦！真心建議小學生來看看,有趣同學到野。

仲有可以比大人小朋友素描下瓷磚的紋理

同時,草草都差唔多時候要食奶了,我地一直行到泳池果到有個育嬰室,雖然舊但勝在企理,要搵保安開門方可使用,唔怕人濫用。 但正因為呢個原因,花媽幾乎在餵奶途中比人開門入嚟,而開門果個仲要係男人!!!!真係唔明白,點解要搵個男保安來開門,而有人用緊育嬰室冇人知嘅咩??佢地咁冇 communication?好彩花媽平日餵奶只會睇下手機,如果聽住音樂的話仲唔咩都比你睇晒???當時好彩花媽即時叫停,佢地冇入嚟。但當花媽試下開度門時,原來佢已經unlock左我度門!!!!大家媽媽真係要小心要搵人開門的育嬰室。

仲有個觀鳥的地方

花媽真係依家先知原來九龍公園有咁多野睇,有博物館又有鳥。我以為只有泳池同遊樂塲添╯﹏╰ 花媽太無知了。哈哈...基本行左小半日花花都冇晒力氣訓左lu。